حسب وصف الدكتورة ماريا منتسورى فى كتابها بعنوان " Dr. Montessori's own handbook " ....
بناءا على التطور الطبيعى للطفل فيسيولوجيا و عقليا ، يمكن ان ينقسم نظام منتسورى التعليمى الى ثلاثة اجزاء :
1- تعليم حركى
2- تعليم حسى
3- تعليم اللغة
1- التعليم الحركى Motor education
لا شك اننا اذا تركنا الطفل دون توجيه لتحركاته ، سيتحرك بعشوائية و بغير نظام
الحركات العشوائية دى هى المميزة للاطفال الصغار ، زى مثلا انه مش بيفضل قاعد مكانه ، بيلمس كل حاجة ف البيت ... و هكذا
و ده اللى بنعتبره - احنا الكبار ف البيت - شقاوة ! و بنتعامل معاه بتكرار كلمة " اقعد ساكت " .. " اقعد مكانك " ....
لكن فى الحقيقة
حركات الطفل العشوائية دى هو بيعملها عشان يدرب نفسه على ترتيب و تنسيق حركاته اللى بيعد نفسه بيها للمستقبل
عشان كده
لازم نبطل اوامرنا للطفل بإنه يقعد مكانه و مايتحركش كتير
و عوضا عن كده نوجه حركته دى بأنشطة مفيدة تخدمه فى الهدف اللى هو اصلا بيسعى انه يوصله
و هو ده هدف التعليم الحركى فى نظام منتسورى
ان الطفل يتعلم ازاى تكون حركته منظمة و منتجة و بكده طفل منتسورى بيكون أهدى و اكثر سعادة من الطفل اللى
بنسيبه يتحرك دون توجيه او بنمنعه من الحركة من الاساس
فى نظام منتسورى التعليمى فى انشطة كتيربيتعلمها الطفل مناسبة لسنه و بيتم توضيحها له بطريقة مبسطة جدا عن
ازاى يعملها صح و كلها بتهدف انها تساعده يعتمد على نفسه و يتكيف مع حياته الجديدة و البيئة اللى حواليه
2- التعليم الحسى Sensory education
كل واحد مننا و اكيد الطفل زينا عنده خمس حواس هبة من ربنا
بصر - سمع - لمس - شم - تذوق
لكن مش كلنا بنستخدم كل حواسنا افضل استخدام فى التكيف مع البيئة من حوالينا
نظام منتسورى ده هدفه تعليم الطفل استخدام حواسه الخمسة بكامل طاقته و توظيفها ف استقبال المعلومات و
المؤثرات الخارجية بطريقة صحيحة و تخزينها فى عقله بسهولة
على عكس التعليم التقليدى اللى بيعتمد اساسا على البصر و السمع فقط اللى هو نظام التلقين
لان اعتمادنا على حاسة او اتنين مع اهمال البقية عامل بالظبط زى كأننا بنغمى عين واحدة لاننا ممكن نشوف بالعين التانية !!
اكيد وقتها بنفقد جزء من الكفاءة و الفاعلية مقارنة لو استخدمنا العينين
عشان كده د/ ماريا اخترعت عدة أدوات تعليمية لتنمية و تدريب الحواس دى عند الطفل
3- تعليم اللغة Language
و ده بيشمل القراءة و الكتابة و التحدث
فى نظام منتسورى .. تعتبر دى مرحلة متقدمة شوية بيتعلمها الطفل بعد ما يكون أتقن تمارين كتير فى التعليم
الحركى و الحسى ، بيكون اتعلم ازاى ينسق بين اوامر عقله و بين حركة عضلاته ، بتكون ايده اتمرنت على
الحركة الدقيقة اللازمة لمسك القلم ، بتكون عينه اتعودت على الملاحظة الدقيقة للاختلاف بين اشكال الحروف ،
بتكون ودنه تعودت على ملاحظة اختلاف اصوات الحروف ... و هكذا
و بردو د/ماريا اخترعت عدة ادوات تعليمية خاصة بتعليم اللغة
طبعا الكلام ده مأخوذ من كتاب د/ ماريا اللى تم تأليفه عام 1914
و كل ما كانت الدنيا بتتقدم .. بردو النظام ده كان بيتطور و بيدخل عليه تحسينات افضل عشان تلائم البيئة المحيطة
بالطفل يعنى حاليا اصبح فى ادوات منتسورى خاصة بتعليم الطفل مواد ثقافية زى الجغرافيا و التاريخ و العلوم و
علم النبات و علم الحيوان و كل حاجة
بدل ما كان نظام منتسورى قديما مصمم خصيصا للاطفال من سن 3-6 سنوات و دى اهم مرحلة فعلا فى عمر الطفل - دلوقت اصبحت مبادىء نظام منتسورى قابلة للتطبيق فى اى سن للطفل من اول ما يتولد لحد ما بعد الجامعة !!
ليست هناك تعليقات:
إرسال تعليق